ثكيله للجواد ع نفس طور راحت أمي وراحت ايام المحنه للرادود محمد الجنامي
***
ها يدنيه إبلا أهل وكت المنيه
الجواد آنه وغريب الكاظميه
ها يدنيه ها يدنيه
*
ها يدنيه راح أعوفج من همومج أستريح
من المدينه من نفاني الظالم وكلبي جريح
غربوني الناصبيه ودمعتي عالخد تطيح
مثل جدي حسين لكن جدي عطشان وذبيح
غربتي تشبه غريب الغاضريه
الجواد آنه وغريب الكاظميه
ها يدنيه ها يدنيه
*
توه عمري بالبدايه وجرعوني كل عذاب
والفرج تخلص حياتي وتنتهي بعز الشباب
دست السم اللعينه وآنه صايم بالشراب
غلكت ابواب بيتي والجبد بسمومه ذاب
راحت وعافتني وحدي الناصبيه
الجواد آنه وغريب الكاظميه
ها يدنيه ها يدنيه
****
من إجه وكت المنيه عله القبله إتجبليت
ولاحنين اللي إجاني بالسطح وحدي إنرميت
لا أهل وأحباب عندي لغربتي هوايه بجيت
ياحسين بصوتي أصيح شلون وحدك من هويت
من عله المهره طحت يبن الزجيه
الجواد آنه وغريب الكاظميه
ها يدنيه ها يدنيه
****
ودعت روحي الحزينه جسمي طايح عالرمال
ظل ثلثتيام مرمي سالم ومابي نبال
حسين عشر خيول داست صدره ماخلتله حال
آنه ماعايف سبيه وعمه جروهه بحبال
تمشي وي ذباح اخوهه الهاشميه
الجواد آنه وغريب الكاظميه
ها يدنيه ها يدنيه
****
جسمي كامل من يشيله الهادي بيه مايحير
بيده غسلهه الجناره ورحت للمثوى الأخير
ويلي عالسجاد لملم جسم ابو اليمه بحصير
وسد المذبوح راسه بس نحر وإبنه أسير
وبركبته الجامعه وحبال أميه
الجواد آنه وغريب الكاظميه
ها يدنيه ها يدنيه
****
أم علي

نزله وتنقري شور للأمام الجواد ع نفس طور شالو جنازتهه للحاج باسم الكربلائي
***********
يامن تحبوني بكل شده انخوني
لمن تزوروني بالكاظميه
*********
حضروني ياشيعة علي بمصابي
آنه الغريب الماإجوني أحبابي
طبعي جواد الجود يم أعتابي
باب المراد إمشرعه أبوابي
لبن الرضه اتعنه ولضامن الجنه
كلكم تعرفوني بالكاظميه
*********
تاسع إمام وبالعرش أنواره
حكمة الباري المرتبه وأسراره
وراث علوم المصطفه وآثاره
والزارني يعني لمحمد زاره
الزياره اقروهه البشاره اخذوهه
بالدمعه ندبوني بالكاظميه
**********
آنه الشفيع وبالحشر راياتي
وبكبري تلكه المعجزه وآياتي
يالزاير انخه وجرب بنخواتي
آنه الوسيله التنقبل دعواتي
انخو الشفيع إلكم ماأنسه دمعتكم
بالغربه واسوني بالكاظميه
**********
آنه الغريب المات جبده دامي
أم اللئامه سممتني وضامي
بموتي وحيد إبلا هلي وأعمامي
وبصواب جبدي تنتهي آلامي
مني خذو عمري واتوسدت كبري
عدواني سموني بالكاظميه
*********
مرمي ثلثتيام وحدي بعازه
وابلادفن فوك السطح الجنازه
وطبع اليموت اتشيله بس اعزازه
مايبقه وحده وعالغرب يتوازه
لمن خذاني البين بالخمسه والعشرين
شاب ويغدروني بالكاظميه
**********
يامن تعنيتو وصلتو لداري
شيعو النعش هاليوم يازواري
آنه الكريم الفرحت خطاري
بيدي أوزع إمراد ليلي إنهاري
للصعبه اكضيهه لا ماأخليهه
لمن تشيعوني بالكاظميه
*******
أم علي

فزاعيه جنوبيه للجواد ع
*******
هاي أم الحسن وتريد لطميه
تلطم عالجواد بكل حسينيه
*******
اجت من البقيع وحاضره يمنه
بمصاب الجواد الزهره تتعنه
يم كبره تنوح وتجذب الونه
ولفكده تون ونات مخفيه
********
دخلت فاطمه للمجلس ويانه
تلطم عالضلع وتريد عوانه
عله المسموم جبده بين عدوانه
تبجي وبالدمع العيون معميه
********
صاحت بالحزن وين التكابلني
عله بلواي وين اللي تساعدني
ونلطم عالشباب نصيح آ يبني
لبو الهادي العزه هاي المسيه
********
ياحيف الجواد بموتته وحده
ماحضرو هله واحباب ماعنده
تذكرت الحسن من سمته جعده
ويلي من الغدر عدهم سجيه
********
ثلثتيام ما مدفون بالغربه
مرمي عالسطوح وحالته صعبه
وبشمس الظهاري ينجوي كلبه
نفس غربة شهيد الغاضريه
********
شباب وماتهنه بعمره يموالين
مثل امه الزجيه من لفاهه البين
طفو شمعة شبابه الخمسه والعشرين
وغريبه اجنازته بالكاظميه
********
أم علي

نزله للحسين ع نفس طور بس خدمتك للحاج باسم الكربلائي
***********
خادم إلك يامظلوم وإسمي بسجل الزهره
**********
خادم إلك والزهره ماتنساني
لو حان موتي بكبري تتلكاني
ويتلعثم بوكت السؤال لساني
لمنكر تكله بهالصوت ضيف الزجيه إتكره
***********
كلمن يواسي بدمعته المنثوره
واليخدم حسين بشهر عاشوره
بهاي الشعائر كلمن ياخذ دوره
حته اليوزع بالماي بالحشر ياخذ أجره
**********
كبل المصاب الهادي شاف اللوعه
ينعه الغريب بكربله بدموعه
صار البجي وصار اللطم موضوعه
وتبدي الشعاير لحسين من يوم قبل نحره
*********
شهر النوايب والمناحه أقبل
من يبدي عبد الزهره يقره المقتل
كل عين بدموع الحزن تتكحل
حته الصخر ون وناح يبجي لقتيل العبره
********
شهر المحرم من يهل اهلاله
عين السمه تمطر دمه هماله
تبجي عله اللي رضته الخياله
بالأعوجيه اعله الكاع ضلوع الذبيح امطشره
*********
يافاطمه حسينج أبد منعوفه
بحزام حزميهه الخدم ملهوفه
بجاه الكفيل الكطعوهه جفوفه
ولخاطر ام العباس لهاي المجالس نظره
*********
أم علي

قصيده للجواد ع نفس طور يامحمد هدت الخياله للرادود مسلم الوائلي
***********
بالنعش بهداي ياشياله
الهادي صاح بدمعته الهماله
******
لاتشيلون النعش تانوني
خلي تشبع شوف منه عيوني
بثامن سنين العمر فجعوني
ليش من حضن الأبو حرموني
ناره فكده بالكلب جتاله
******
للزمان بدمعتي عتبيته
راح ابويه بساع عايف بيته
ماحضرت بموتته وجبليته
ياشباب وللكبر زفيته
والشمع والياس يبجي اكباله
******
عالنعش ونيت واحنيت الضلع
ابنك الهادي تعوفه بياوضع
اويه الجواد احجيت وبفيض الدمع
عمرك اتبده مثل عمر الشمع
والشبع من الأبو هنياله
******
جبدتك اهل الغدر سموهه
ياغريب الدار مارحموهه
والجنازه ابلا دفن عافوهه
والهواشم ماإجو شالوهه
آه من حكم الدعي وافعاله
*******
إعليك مابطل يابويه نوحي
شلون اهيد شلون تشفه جروحي
من ادفنك بيدي ادفن روحي
اتهدمت بعدك عليه صروحي
الدنيه ويه اهل العدل مياله
******
أم علي

فزاعيه او شدة لطم للجواد ع
**********
لباب المراد إتوجهت دكيت بابه الليله
**********
جاري وأريدن فزعته بكل شده أكصد حضرته
تجلي الهموم إزيارته لو صحت وينه إدخيله
********
أنعاه والمدمع يصب لمصابه مجروح الكلب
فكد الشباب شكد صعب كل محب دمعه يسيله
**********
أبجي لشباب إبن الرضه بالجبد سمه من مضه
وحده غريب ومن كضه ياهو الذي يتجيله
********
لايمه إخوه ولا إبن بالشمس مرمي ابلادفن
بس الحمام إعليه يون بدم ودمع ينعيله
*********
أنخاه روحي إمعلعله يامن تحل المعظله
عبدك بدنياته إبتله ومهدوم منهه حيله
*********
بالنفس مخنوك الصدر ياشافعي بيوم الحشر
جيتك أمشي أم الخدر همي العليه إتشيله
*********
أنخه الجواد بشدتي بأحزاني يدري وعلتي
أمسح الباب بدمعتي وبكتره أذب الشيله
*********
أم علي

ثكيله للعباس ع نفس طور ودعتك روح للرادود صادق الدمستاني
***********
ونيت بليل بدمعي الهمال
ماظل كل حيل وهمومي إجبال
يابو الفضل اختك عله الناكه خذوهه
كل خطوه بسنه عمر السبي من يسروهه
ونيت بليل
********
أون بلوعة أحزاني عسنك تسمع ونيني
خذوني بالغصب عنك يخويه اعداك سابيني
دكوم بعازة جفوفك يمن فدواتك يميني
يريت الموت اخذ عمري ولاعوفك يضي عيني
ها ياعباس يالوعدك دين
مابين ارجاس وين الجفين
امشي ودرت عيني عله الخوه الخذوهه
كل خطوه بسنه عمر السبي من يسروهه
ونيت بليل
********
مثل جودك يبو فاضل تبده إعله النهر صبري
تموت وتخلص ايامك وآنه ينولد قهري
سهم عينك مرد روحي يريته نابت بصدري
عمت عيني ولا أمشي سبيه وسلبو خدري
ماعندي اخوان وإمدنكه الهام
خويه العدوان حركو الخيام
خيامك يبو الغيره الأعادي فرهدوهه
كل خطوه بسنه عمر السبي من يسروهه
ونيت بليل
********
يخو زينب بجيت اعليك دمعه اتسابك بدمعه
احترك عمري البقه خويه مثل خيط بوسط شمعه
هم سامع كلب انسان يظل عايش بلا ضلعه
يخويه وضلعي ياعباس مشيت بهمي متكبعه
دمعاتي دموم يابو الكلفات
اختك هاليوم بين الشمات
جرح السجاجين الحجي من شتموهه
كل خطوه بسنه درب السبي من يسروهه
ونيت بليل
**********
اعاتب من هضم كلبي زماني المارحم بيه
من عكب الدلال الراح بحبل مشدوده ايديه
عفت اهلي عله التربان ذبايح وامشي مسبيه
خيالي الجان ماينشاف الزلم تتفرج إعليه
بولية ذباح والروس وياي
اتعلكن برماح عطشانه الماي
كطرة عذب من النهر ماضوكوهه
كل خطوه بسنه درب السبي من يسروهه
ونيت بليل
**********
بكلب زينب ربيت سنين واكبالي جنت تكبر
مثل امك اخاف اعليك يخويه من الهوه لو مر
كمر ليلي وضوه دنياي بسيوف العده اموذر
مثل مافرهداك البين آنه اتفرهدت بالبر
مجويه اجدام صعدونه النوك
بالكوفه وشام فرونه السوك
بسوط الشمر حيف العقيله يضربوهه
كل خطوه بسنه درب السبي من يسروهه
ونيت بليل
*********
أم علي

فزاعيه للسبي
*********
كل يوم منصوب العزه للراكبه اعله الناكه
*******
نهدي عزانه واللطم بالغربه زينب تنسكم
صعبه العزيزه تنهضم خلي لطمنه املاكه
*******
نبجي الدمع وياهه نلطم عله ولياهه
شلون الوكت خلاهه فروهه بين إسواكه
*******
ذبحو زلمهه العدوان والخيم تسعر نيران
ظل بس عليل ونسوان بالكيد حزو ساكه
*******
عاشر محرم من جزه لأخوتهه مانصبت عزه
بحبال اديهه امحززه والوالي صعبه افراكه
*******
يوميه ننصب مأتمه نواسي الزجيه فاطمه
دمعاتهه تجري دمه فوك الوجن حراكه
*******
من طاح اخوهه العباس كطعو جفوفه الارجاس
وتشمتت بيهه الناس لفزعة اخو مشتاكه
********
مسبيه اخذوهه الغرب وحسين مرمي عالترب
حسرتهه ظلت بالكلب جمره بكلب عشاكه
*********
أم علي

شده للقاسم ع
********
عريس الولد زفيته للتربان
محروم الهوه ومن كشخة الشبان
*********
رمله تصيح منك اكطع الظنه
من دم النحر يوليدي تتحنه
ازفك للكبر بالحسره والونه
بكلب امك يجاسم تسعر النيران
******
حرمني البين ماخلاني افرح بيك
بسيوف العده وانبالهه مطشريك
ماعندي دوه لجروحك واشفيك
وي رمله الدهر يبن الحسن خوان
*********
ماعندي ظنه هالواحد حويتك
لأيام الكبر والشيب ربيتك
اخافن تنحسد بعيوني ضميتك
مهدك جان بين ضلوعي والاحضان
*********
عله مصابك انوح ودمعتي تجري
ولشمعة شبابك يحترك عمري
كبل يومك يريته ينحفر كبري
ولانحرك اشوفه منذبح عطشان
*********
بعيوني العمه ولاشفتك اكبالي
راسك عالرمح جسام يالغالي
كضيت ايام حلوه وياك وليالي
متردهن بعد لادمعه لا احزان
*********
جروني غصب يبني ورحت عنك
روحي اتعذبت امشي واعوفنك
الله وياك يمه شلون اودعنك
وابحر الشمس نايم بلا أجفان
*********
أم علي

شده لعبد الله الرضيع ع
*****
إزغير يالرباب ومانمت ليلي
عطشان واون يايمه لوليلي
*****
يبجي هالطفل واتحيرت بأمره
منين الماي اجيبه وكربله صحره
كلبه يكول يمه جبدتي جمره
من حر الشمس يايمه فييلي
*****
يحاجيني بدمعته وروحه متألمه
بعد ماكالهه ياجملة اليمه
ست شهور عمره امخضب بدمه
بشعوري يصيح يايمه تعاليلي
*****
تعالي يالرباب هناك ودعيني
بحضن حسين والعدوان سابيني
بنبله حرمله مذبوح شوفيني
وبآخر نفس بهداي إبجيلي
*****
بنيران العطش خلوني اتجوه
ماراضع حليب وجبدي يتلوه
من دم النحر بالركبه أتروه
ماشوف الدرب بعيوني ضويلي
*****
أموت وغربة المظلوم بهمومي
لاتسين عملة حرمله ويومي
بدموم الوريد انصبغت هدومي
يم راسي اكعدي اليوم وانعيلي
*****
آنه ازغر شهيد الراح لجل الدين
دمي للسمه بيده رماه حسين
عيني عالنهر من طاحن الجفين
عله العباس عمي يمه سلميلي
*****
أم علي

شده للعباس ع
*****
غريبه يابو فاضل كوم ويايه
ضيعت العرف من طاحت الرايه
*****
اجيتك والمصايب تحدي كدامي
لكيتك عالشريعه إموذر ودامي
اخبرك يابو فاضل حركو خيامي
جبت هموم كلبي وجيت شجايه
*****
ياعباس اصيح وتنزف جروحي
سهم عينك احسه نابت بروحي
اشلعه لو اعوفه ها يمذبوحي
مجروح الكلب بمصابك هوايه
*****
ماتدري الاعادي استوحدو الحسين
بطيحة رايتك وبطيحة الجفين
مذبوح الولي إلمن أدير العين
يخويه مو وكتهه نومتك هايه
******
فلت خوتي وياك والعشره
نيران الشماته بالكلب جمره
أنه بعازة يمينك خويه واليسره
عالجفوف الكطيعه نوحي وابجايه
******
لسوالفنه كبل حنيت والكعده
زماني الراح ويه اخواني شيرده
ماظلي اخو حته اكعد بسده
مابين الزلم والخيل ممشايه
*******
اودعك جيت يالماخذهه لسنيني
ماشوفك بعد خويه شلي بعيني
حداي الشمر بالسوط سابيني
يجروني بحبل بولايه لولايه
*******
أم علي

شده للباقر ع
******
تعنيتك حزينه بكسرة الخاطر
بونات الكلب انعاك يالباقر
******
اجيتك للبقيع بروح مهضومه
انعاك بدمع وضلوع مهشومه
مهدوم الكبر والكبه مهدومه
يبجي لياظليمه هالدمع حاير
******
بمصابك مصايب كربله تنعاد
بجيت دموم يبني والدمع مافاد
كضيت العمر تنحب لبو السجاد
وتذكر من بقه وحده بلا ناصر
******
عمت عيني عليك شلون من شفته
خمس سنين عمرك جان من عفته
امسلب عالتراب الخيل ساحكته
ضلوعه امطشره وبيهن أثر حافر
******
جروح هواي بيك شلون اداويهه
من عاشر محرم تنزف ادريهه
عمتك بالسبي مجويه رجليهه
يجروهه بحبل وانته جنت حاضر
******
بعيونك شفت يبني حرك الخيام
وايام السبي ماتنسه هالايام
كدامك رقيه تموت بارض الشام
بكلبك يامصاب اليلهب وشاجر
******
عله المسموم جبده تنزف عيوني
يوميه بولد عدواني فجعوني
من كبر لكبر أفتر يخلوني
نوحي مابطل من لوعة العاشر
******
أم علي

شور وينقري هوسات للعباس ع نفس طور طاحن من صهيل الخيل للسيد فاقد الموسوي
***********
طاح العلم راعي العلم جا وينه
كطعو يساره عالنهر ويمينه
بسهم الغدر عباس طفو عينه ٢
ناديتك ياخويه آنه ام الخدر
من جيتك ملهوفه لاحكني الشمر
سلبوهن بنات حسين كوم اكعد يبو الغيره
********
اركض اجيتك شايطه من الحومه
عباس كوم وعوف هاي النومه
إلحك حسين امسلبات هدومه ٢
إمغسلينه بدمومه حزو منحره
ياخويه السلابه كطعو خنصره
بيد الشمر راس حسين ويهوس بالعمامه
********
لصوب الشريعه جيت ياكفالي
ماعندي غيرك اشتكيله احوالي
نار العطش تلهب بكلب اطفالي ٢
لاماي ولا جربه وبعينك سهم
والعسكر ياخويه حركوهه الخيم
رقيه فرت من النار سلبوهه تراجيهه
********
جابو الهزل خويه إلحك لينه
تتلفت لشاطي المنايه سكينه
واتكلي ياعمه ابو فاضل وينه ٢
مايدري يجرونه بحبال السبي
مجويه رجلينه ومحروكه العبي
بخيل السحكت العطشان اطفالك يسحكوهه
*********
متعود بأسمك يصيح لساني
عباس خويه هالشمر أذاني
بالسوط تقبل عالمتن طكاني ٢
ضربوني وشتموني حرمه ابلا ولي
ولاجني ياخويه زينب بت علي
يضحك لو صحت عباس خويه اتشمتو بيه
*********
أم علي

ثكيله للقاسم ع نفس طور نعش الوفيه انشال للحاج باسم الكربلائي
***********
زفة عرس للموت والحنه دمه
شمعاته بالدمعات طفتهن أمه
بالدم خضيب جاسم غريب
والحنه دمه
********
آنه امك يجاسم جيت اودعك والدمع احمر
ربيت وسهرت الليل جنت اتنطرك تكبر
وبتعب السنين الراح لزفة عرسك اتحضر
ماجانت تمر عالبال احنيك بدمه المنحر
جيت بسواد الليل جرحك اطوفه
مثل الشمع من ذاب عمرك اشوفه
صبري عجيب جاسم غريب
والحنه دمه
*********
جنين بروحي تسع شهور حملتك يبني وبتعبي
بشرايين الكلب عايش وارويك بنبض كلبي
ولمن شلتك بحضني صرت يبني ضوه لدربي
من عيني اخاف اعليك وادعي يحفظك ربي
يوليدي عام بعام نكبر سويه
ماحسبت الفراك بالغاضريه
بنوح ونحيب جاسم غريب
والحنه دمه
*********
يبن كلبي انوح اعليك جاسم ياأعز انسان
مثل طير الكطه المذبوح كلب امك بلاجنحان
عكب ذاك الدلال الراح نحرك منذبح عطشان
بسيوف العده موذريك يبني ودامي عالتربان
من كل كتر مجروح ياييمه جسمك
ماي وتبده بكاع وشلون ألمك
موقف رهيب جاسم غريب
والحنه دمه
********
مشيت بكسرة الخاطر سبيه يالولد يبني
محنية ظهر وانعاك فكدك يمه شيبني
باجر تندفن بتراب واظل بنوحي وبوني
ماانساك ابد للموت افرح موتي لو مرني
احسبهه بالساعات ساعة مماتي
ونتلاكه آنه وياك يبني بوفاتي
جرحي يطيب جاسم غريب
والحنه دمه
********
أم علي

ثكيله للأكبر ع نفس طور ماجانت هاي ابالي للسيد فاقد الموسوي
***********
يالأكبر يبني شبيدي إمطبر شفتك يوليدي
ياجرح اضمده هوايه الجروح
إلتمن خواتك وأمك تنوح
ياضوه العين ياضوه العين
*******
يبني بالخيمه انجمعنه انصبنه مأتم للحزن
آنه وحسين وخواتك يمك اكعدنه نون
زينب بدمع المصيبه تبجي ويانه وتحن
امغسل بدم المنيه ليش مرمي ابلادفن
يبني وفرحة أيامي يالذبحوك انته وضامي
سباح كلبي ومهجة الروح
إلتمن خواتك وامك تنوح
ياضوه العين ياضوه العين
********
ذبل وجهك ياحبيبي اليشبه الهادي النبي
شوفهن ذني خواتك فرشن احداك العبي
وحده تمسح دم وريدك وحده اخذت معصبي
شدن جروحك ييمه وكلبي سابيني سبي
ينزف كلبي اعله مصابك يكتل يوليدي غيابك
من بين اديه ياعلي تروح
إلتمن خواتك وامك تنوح
ياضوه العين ياضوه العين
*********
من رحت للحومه ترجع سالم هوايه دعيت
بكر ابن غانم صرعته شلون حالك من اجيت
من العطش يابس لسانك ضامي جبدك مارويت
ارجعت للحومه تقاتل بالغدر يبني انوليت
ودعتك آنه وصبري سالم ماترجع ادري
ترجع إليه بنحر مذبوح
إلتمن خواتك وامك تنوح
ياضوه العين ياضوه العين
**********
يبني منك شح نصيبي ولشبابك حسرتي
فجعه موت الشاب يمه يامراري ولوعتي
لو بجيت الدهر كله ماتردك دمعتي
علي هالواحد فكدته ياهو يحضر دفنتي
يبني وغيرك ماعندي ياهو يوسدني بلحدي
ليل ونهار الدمع مسفوح
إلتمن خواتك وامك تنوح
ياضوه العين ياضوه العين
**********
من شفت عالكاع طولك ودعت طعم الحياة
شللي بيهه سنين عمري مااشوفك للممات
سند يبني جنت إليه من تمرني النايبات
يالعفت امك وحيده تنسبي بغربه وتبات
امك تمشي ومجتوفه اخذوهه الشام وكوفه
بعدك يالأكبر حملي مطروح
إلتمن خواتك وامك تنوح
ياضوه العين ياضوه العين
**********
أم علي

ثكيله لأم البنين ع نفس طور آنه والاحباب للرادود محمد الجنامي
***
يالفركتك نار روحي بلا دار
يحسين يبني للهجر عفتوني
امكم واموت بحسرتي تدروني
روحي بلا دار
**
امكم يبعد امكم بقت لاحيه لا هي ميته
من شال ضعنك يالولي طعم الحياة افكدته
بالكوه اشهك بالنفس والدمع يجري سكته
آنه وعليلتكم صحت يحسين ترجع يمته
كل ساعه اشتاك كاتلني الفراك
وبالمغربيه مادريت شلوني
امكم واموت بحسرتي تدروني
روحي بلا دار
***
محنيه امشي من القهر اعثر واكوم بوني
ياهيه مثلي من البشر وياهيه تحمل حزني
راحو بنيني الاربعه وحسين يرجع ظني
تاليهه ماواحد رجع وماتت حجاية يبني
أمشي بلا راي وأتلفت هواي
أم البنين الفاجده يسموني
امكم واموت بحسرتي تدروني
روحي بلا دار
****
طبع اليفاركله محب بالكلب حزنه يشيله
تتوارد بعينه الصور تنزل دمع تحجيله
ياكلبي عفيه وبي نبض فاركت خمسه بليله
ذبلانه عيني من السهر والهجر مالي حيله
وناتي شتفيد للراحو بعيد
اغفه وافز ودمعتي بعيوني
امكم واموت بحسرتي تدروني
روحي بلا دار
****
بكل وكت ابعث سلامي بلكت اتوصله الرياح
تدري متعوده اعله شوفك يومي ليل ابلا صباح
يبن حيدر روحي يمك من تعبهه تستراح
غربتهه الطير جانت هسه مكسورة جناح
روحي والجروح لغيابك تنوح
معلوله بس بصوتك يداووني
امكم واموت بحسرتي تدروني
روحي بلا دار
****
الناعي من جاني بخبركم جيته اركض واعثرت
كال ولدج يالحنينه وذروهم واصبرت
راسك براس العوالي يبو اليمه من اسمعت
شاب راسي بلحظه وحده وبهمومي آنه متت
والكمر مذبوح عالشاطي مطروح
كطعو جفوفه بطيحته فجعوني
امكم واموت بحسرتي تدروني
روحي بلا دار
****
أم علي

فزاعيه جنوبيه للعباس ع
*********
عله العباس حكج لو تنوحين
شجابج للشريعه يخت الحسين
*******
تكله يابو فاضل خويه وينك
طاحن عالنهر يسراك ويمينك
لكيتك بالسهم مطفيه عينك
حكي من البجي أعميهه للعين
*******
يكلهه للخيم يم عون ردي
اعذريني يزينب هاذه حدي
اتحضري للسبي والنوح بعدي
يازينب شجاج إوين تردين
*******
تكله ياكمر هاشم يوفاي
ياحامي الشريعه ونور عيناي
يخويه مو وكتهه طيحتك هاي
دكوم وياي سبوني الملاعين
*******
يكلهه يهون كلشي ولاتهوني
متهمني الجفوف ولا عيوني
خدرج خل يظل ويموتوني
اموت ولا اشوفج يمي تبجين
*******
يبو الغيره تكله ماني إختك
عمت عيني عليك شلون شفتك
يجروني غصب عالشاطي عفتك
راسك بالعمد مكسوم نصين
******
يازينب يكلهه شلون انساج
راسي عالرمح وديته وياج
وبطول الدرب ياخويه يرعاج
اخاف اعليج زينب لاتموتين
******
أم علي

شده لعبد الله الرضيع ع
*******
دللول الولد عبد الله اناغيه
لكيته بالخيم مامش نفس بيه
*******
ترف خد الطفل بالعاده ينباس
مو مالت سهم بالركبه ياناس
اجيته ابلا وعي واصرخ يعباس
اكعد يابو فاضل لأبني اسكيه
*******
يفرفح بالعطش مارحمو احواله
ست شهور عمره وذاب دلاله
شلون انطاك كلبك آ يجتاله
رميته بالسهم و بدمه ترويه
*******
ضمه بالعبايه حسين لوليده
كطرة ماي راد يشربه بيده
لاحوه بالسهم واتكطع وريده
اكماطه من الرفس فلاه بيديه
*******
عذبني مصابه ولوعتي لوعه
اون اعله الولد ونات موجوعه
ابوه حسين يمي محني بضلوعه
مذبوح الطفل وابيش اداويه
*******
مصابك ماجره بس يوم عاشور
بنبلة حرمله يالغالي منحور
ازغير عالذبح ولنوم الكبور
تابوت اعله كدك وين ألكيه
*******
جنت يوميه اناغيك وتناغيني
ساكت ليش ياعبد الله حاجيني
كبلك ريت يمه الموت يلفيني
ولافوك الرمل مطروح اخليه
*******
أم علي

ثكيله للسيده شريفه ع نفس طور ابابك ومديت اديه للحاج باسم الكربلائي
*********
عدنه بالحله أميره إزغيره بس كلش جبيره
تأمر وتنهي مثل شيخة عشيره
**********
عن شريفه الليله شحجي وياحجي اليوفيهه
بجفهه تلكاهه المعاجز والله لو تنخيهه
تكضي حاجات الموالي بس يجي طاريهه
وإبختهه اليوم اريدن حاجتي تكضيهه
حاشه مترجع إديه بالكرم معروفه هيه
تأمر وتنهي مثل شيخة عشيره
***********
امعسرات هواي عندي فوك ظهري شايل
ماحجيت هموم كلبي لأي بشر ماكايل
كالو ام هاشم تحلهه وماترد السائل
كون من تدخل صحنهه اتصيح يابو فاضل
بعلتي ظليت حاير ولشريفه امشيت زاير
تأمر وتنهي مثل شيخة عشيره
***********
كل مريض يزور كبرج ونته مخفيه
من يأيس من طبيبه بعله مستعصيه
يلكي دكتوره عجيبه إبلا دفع كشفيه
حته لو مشلول يمشي بمعجزة علويه
يالسبيه ويالغريبه لكل مرض اعظم طبيبه
تأمر وتنهي مثل شيخة عشيره
***********
من نزورج يالحنينه عالدرب راياتج
كلمن تشافين علته مانسه وكفاتج
شكرا اعله الرايه كاتب من فضل دعواتج
ياملاذ الشيعه كلهه والكرم آياتج
مثل ابوج الحسن انتي بطيب واحسان انعرفتي
تأمر وتنهي مثل شيخة عشيره
**********
ياغريبه بدار غربه من الأهل محرومه
من لفاج الموت جنتي بالسبي مهضومه
شخله بيج من المصايب عاشر ويا يومه
حسين مذبوح وخضيب امسلبات هدومه
جتفوج اعله الهزيله من القهر صرتي عليله
تأمر وتنهي مثل شيخة عشيره
**********
أم علي

نزله للعاشر نفس طور صارت عشيره الخدام للرادود موسى البولاني
**********
يافاطمه جيبي الماي لحسين طلعت روحه
********
يمه يالزهره تعالي الليله
مصاب ابو السجاد مالي حيله
مات ضامي ومحد ايتجيله
عالرمل طشروه ياهو يشيله
عطشان ابنج رويه بدمعاتج المسفوحه
********
يمه يالزهره المهر رد خالي
انخمش كلبي مادريتي بحالي
واعرفت مذبوح اخويه الغالي
ياهو اليشده لجرح دلالي
بالسيف مذبوح حسين واخته بحزن مذبوحه
********
هاي عشر خيول اجت يالزهره
بالحوافر حيل تسحك صدره
امهشمه ضلعين إلج بالعصره
ضلوع اخويه حسين كلهه امكسره
الف وتسعميه جروح وشلون اضمد جروحه
*********
يمه ذبحو كل هله وازلامه
بطيحة العباس طاح احزامه
كومي يالزهره نلم اعظامه
راح اخويه وعشرته وايامه
وانتهت كعداتي وياه واسوالفه المملوحه
*********
عينه مفتوحه ويصد إعلينه
يخاف يمه الشمر لو يسبينه
عالمتون بسوطه يضرب بينه
وحده وحده بحبل شد ايدينه
عالرمح يهتز الراس عينه بقت مشبوحه
********
أم علي